La spitex

Tgei intent ha la spitex?
„Spitex“ vul gir tgira externa dil spital, cussegliaziun ed agid a casa.
Grazia allas prestaziuns dalla spitex san persunas pertuccadas restar a casa en lur contuorn usitau malgrad limitaziuns corporalas. Ni ch’ellas san turnar a casa pli baul suenter ina dimora el spital.

Finamira dalla spitex eis ei adina, da mantener e promover l’autonomia persunala da sias clientas e ses clients. Leutier sesprovan las collaboraturas adina dad integrar el sustegn ed ella tgira ton sco pusseivel il contuorn privat dallas persunas pertuccadas.

Tgi sa far diever dalla spitex?
La spitex ei a disposiziun da tuts habitonts da tuttas vegliadetgnas ch’ein dependents d’agid pervia da malsogna, accident, invaliditad, vegliadetgna, maternitad ni ch’ein surcargai.
Il basegns da sustegn vegn eruius ensemen cul client tras ina examinaziun individuala cunscienziusa e premurada.
Hosps assistin nus tenor pusseivladad bugen.

Survetsch da pichet
Per nossa clientella eis ei endrizzau in survetsch da pichet da 24 uras. Il gi ora san ins contonscher direct sur il natel la tgirunza diplomada ch’ei en survetsch. La notg surpren ina centrala il survetsch da pichet la quala cloma tenor basegns ina da nossas tgirunzas diplomadas.
Da cuminonza culs miedis da casa?
Ils miedis da casa ni autras persunas specialisadas che tractan nos clients ein per nus partenaris impurtonts culs quals nus collaborein stretgamein.

Obligaziun da discreziun e schurmetg da datas
Ei secapescha da sesez che tuttas nossas collaboraturas e collaboraturs ein s’obligadas alla discreziun ed al schurmetg da datas.

Cumpetenza professiunala
Las collaboraturas dalla spitex possedan ina scolaziun specialisada per la tgira da spitex, e quei sto tgirunza/tgirunz diplomada/-au, sco tgirunza/tgirunz da casa, spezialista da tgira (FaGe) ni sco gidontra/gidonter da casa cun cuors da tgira dalla Crusch cotschna svizra.